(باشوریێ خوه‌راگر) فلمى نوى یێ شینوار كه‌مال

ددیروكا مروڤایه‌تیێ دا گه‌له‌ك كه‌سا ژیان و شیانێت خوه‌ بو هاریكاریا مروڤایه‌یتیێ و گه‌هشتنا وان بو ماف و ئازادیا وان ته‌رخان كرینه‌, ژوان كه‌سا ژى گه‌له‌ك كه‌سێن كورد هه‌بوون و هه‌بووینه‌ كو هه‌مى ژیانا خوه‌ پێشكێشى حزمه‌تا مروڤایه‌تیى ب گشتى و ملله‌تێ خوه‌ ب تایبه‌تى, له‌ورا یا فه‌ره‌ مروڤ ماندى بوون و قوربانیێت ڤان جوره‌ كه‌سا ژبیرنه‌كه‌ت و به‌رامبه‌ر خزمه‌تا وان یا مه‌زن مروڤ ژى هنده‌ك خزمه‌تێ پێشكێشى وان بكه‌ت, ئه‌ڤه‌ ئێك ژوان ئه‌گه‌رێت سه‌ره‌كى بو یێت كو ئه‌ز پالدایم داكو فلمێ دیكیومه‌نتى (باشوریێ خوراگر) ل دور ژیان و به‌رهه‌مێ بابێ روحى یێ سینه‌ما كوردى (یه‌لماز گونایى) دروست بكه‌م.ل ده‌سپێكا مه‌ها 11 یا سالا 2008 مه‌ ده‌ست ب دروستكرنا ڤى فلمى كر, بێگومان فلمێ دیكیومه‌نتى كاره‌كێ جودایه‌ ژ فلمێت دى كو ئه‌ڤه‌ جارا سیێ ئه‌ز ب كارێ دروستكرنا فلمێ دیكومه‌نتى پشتى فلمێ (دوماهیكا دكتاتورى) و (ده‌نگێ دیروكێ) كو ئه‌ڤ هه‌ردووكه‌ كورته‌ فلمێت دیكومه‌نتى بوون و دیسان كورته‌ فلمێت سینه‌مایى (ژیان دگه‌ل بابه‌لیسكێ) و (شه‌ق) ئه‌ڤه‌ ئێكه‌م فلمێ منێ درێژه‌ كو ماوه‌یێ وى (80) خوله‌كن, و به‌حسێ هه‌مى ژیانا یه‌لماز گونایى ژ دایك بوونێ تا وه‌غه‌ركرنێ دكه‌ت و هه‌مى به‌رهه‌مێ وى یێ ئه‌ده‌بى و هونه‌رى, كو پشت به‌ستى ل سه‌ر نڤێسین و فلمێت وى بخوه‌ دیسان چه‌ندین ژێده‌رێت دى یێت ناڤدار هاتیه‌ كرن.ئارمانج ژى ژ دروستكرنا ڤى فلمى ئه‌وه‌ كو چه‌نده‌ك ژ ژیان و خه‌باتا گونایى یا تژى ئاسته‌نگ و نه‌خوه‌شى و سه‌ركه‌فتن پێشكێشى خه‌لكى بكه‌ین, به‌لكو ئه‌و كارێت گونایى ئه‌نجام داین تێرا وى هه‌نه‌ پێ بهێته‌ نیاسین و سه‌ركه‌فتنێن جیهانى یێت وى دوارێ ئه‌ده‌بى و هونه‌رى ب ده‌ست ڤه‌ ئیناین وه‌ك مه‌زنترین خه‌لاتێ ڤیسته‌ڤالا (كان) یا سینه‌مایى یا نیڤ ده‌وله‌تى بو فلمێ (yol) ل سالا 1982, به‌لێ گه‌له‌ك جارا نه‌مازه‌ ل كوردستانێ, ئه‌ڤ كار و به‌رهه‌مێت گونایى ب ده‌ست ناكه‌ڤن و ئه‌گه‌ر هه‌بن ژى گه‌له‌ك دكیم و كورتن, له‌ورا ژى دیكیومه‌نت كرنا ژیان و به‌رهه‌مێ وى من ب فه‌ر دیت ئه‌م پێ راببین و وه‌ك ئه‌ركه‌ك من زانى كو ب دیتنا من دێ كاره‌كێ باش بیت و دێ شێت چه‌نده‌كێ ژ ژیان و خزمه‌تا گونایى پێشكێشى خه‌لكى كه‌ت. نوكه‌ ئه‌ڤ فلمه‌ دقوناغێت ناڤه‌راست دایه‌ و مونتاژه‌كا ده‌سپێكى بو هاتیه‌ كرن و و ل ده‌سپێكا مه‌ها 11 مه‌ل به‌ره‌ به‌ره‌ف وه‌لاتێ توركیا ڤه‌ بچین و جهێ ژدایك بوون و مه‌زن بوون و زیندانكرن و ئه‌نجام دانا كارێت گونایى بهێنه‌ وێنه‌كرن و دیسان ئه‌گه‌ر هاریكارى هاته‌ كرن مه‌ل به‌ره‌ به‌ره‌ف وه‌لاتێ فرنسا پاریسێ ڤه‌ بچین كو خێزانا وى ل وێرێ یه‌ و چاڤ ب وان ژى بكه‌ڤیت و گورێ وى ژى ل وێرێ یه‌ ئه‌وژى بهێته‌ وێنه‌كرن. مه‌ل به‌ره‌ ل دوماهیكا مه‌ها 12 یا سالا 2009 ئه‌ڤ فلمه‌ ب دوماهیك بهێت و ئه‌گه‌ر جهه‌كى خوه‌ لێ كره‌ خودان چ ل هولا بهێته‌ نمایشكرن یان ل شاشه‌كا تێله‌ڤزیونى یانژى وه‌ك dvd بهێته‌ به‌لاڤكرن و ئارمانج ژى بتنێ ئه‌ڤه‌ یه‌.تاكو نوكه‌ رێكخراوا مه‌ند بو یه‌كسانیێ هاریكاریا من د ئه‌نجام دانا ڤى فلمى دا كریه‌ و كارێت دژى هه‌میا ئه‌ز بخوه‌ ل سه‌ر مه‌زاختیێت خوه‌ یێت تایبه‌ت پێ رابویمه‌ دیسان هنده‌ك جهێت دى ژى سوزدایه‌ مه‌ كو هاریكاریا مه‌ بكه‌ن لێ ئه‌ز دى َهینگێ سوپاسیا وان كه‌م ده‌مێ هاریكاریێ دكه‌ن.
ناڤێ فلمى / باشوریێ خوراگر.ده‌م/ 80 خوله‌كزمان/ كوردى- كرمانجىسیناریو و ده‌رهێنان و مونتاژ / شینوار كه‌مالبه‌رهه‌م / رێكخراوا مه‌ند بو یه‌كسانیێسال/2009